Био-Сонгино орчмын шинэ суурьшлын бүсийн төлөвлөлт хийгдэх хил хязгаар нь Улаанбаатар хотын төвөөс 22.5 км-т Хан-Уул дүүргийн 12 дугаар хорооны нутаг дэвсгэрт байрлах 89.8 га талбайг хамарна. Төлөвлөлт хийгдэж бүсэд одоогоор хүн ам суурьшаагүй ба иргэн, аж ахуйн нэгжид ямар нэгэн газар олголт хийгдээгүй газар юм.

Био-Сонгино орчмын шинэ суурьшлын бүсийг Улаанбаатар хотын хөгжлийн ерөнхий төлөвлөгөөний дагуу нутаг дэвсгэрийн үүрэг зориулалтын 6 үндсэн бүс, 7 дэд бүс болгон хувааж бүсчлэл төлөвлөлтийг хийж гүйцэтгэлээ. Орон сууцны 22.9 га, олон нийтийн ажил хэргийн 14.1 га, үйлдвэрийн 25.25 га, ногоон байгууламжийн 12.25 га, инженерийн шугам сүлжээний 0.83 га гэсэн үндсэн 5 үүрэг зориулалтын бүстэй байх ба 17.43 га хорооллын чанартай зам талбай төлөвлөгдсөн. Орон сууцны 39.03 га бүс нь дунд давхрын 15.19 га, хувийн орон сууцны 23.84 га талбай бүхий дэд бүсүүдэд хуваагдана. Үүрэг зориулалтын 6 бүс нь 7 дэд бүсээс бүрдэх бөгөөд дэд бүс нь хорооллын чанартай 2 зэрэглэлийн туслах замаар нийтдээ 22 хэсэг болж хуваагдана.

Төлөвлөлтийн шийдэл

Төлөвлөлтийн концепц, шийдлийг Био-Сонгино орчмын инженер геологийн нөхцөл байдал, байгаль орчны төлөв байдал, орчны нөлөөлөл, архитектур орон зай, газар ашиглалт, инженерийн дэд бүтцийн хангамж, хот байгуулалтын иж бүрэн үнэлгээ, Улаанбаатар хотын хөгжлийн ерөнхий төлөвлөгөөнд тусгагдсан байдал зэрэг хот төлөвлөлтийн суурь судалгааг хийж, үнэлгээ өгсний үндсэн дээр боловсрууллаа. Био-Сонгино орчмын шинэ суурьшлын бүсийн хөгжлийн тэргүүлэх чиглэлийг Улаанбаатар хотын хөгжлийн ерөнхий төлөвлөгөө болон Био-Сонгино, Туул шувуун фабрик орчмыг хөгжүүлэх ерөнхий төлөвлөгөөний хөгжлийн тэргүүлэх чиглэлтэй уялдуулан дараах байдлаар тодорхойлж байна.

Үүнд:

Амралт сувилал, клиник сургалт
Зочид буудал, худалдаа
Дөрвөн улирлын хүлэмжийн аж ахуй
Орлогод нийцсэн орон сууцны хороолол

Төслийн үр дүн

Био-Сонгино орчмын шинэ суурьшлын бүс нь нийт 176.585 м2 талбай бүхий орон сууцны барилга төлөвлөгдөж байгаагаас хорооллын ажил хэргийн бүсэд 24.85% буюу 43,890 м2, дунд давхрын орон сууцны бүсэд 66.68% буюу 117,753 м2, хувийн орон сууцны бүсэд 8.46% буюу 14,942 м2 орон сууц бий болно.

Төлөвлөлт нь 6 дэд бүсээс цэцэрлэгт хүрээлэн, ногоон байгууламж, хөнгөн үйлдвэр, зам тээврийн бүсүүдэд хүн ам суурьшихгүй бөгөөд зөвхөн үйлчилгээ, үйлдвэрлэлийн чиглэлээр үйл ажиллагаа явуулахаар төлөвлөсөн. Шинэ суурьшлын бүсийн 2370 өрхийн 7584 хүн ам дараах байдлаар бүрдэнэ. Үүнд:

Хорооллын худалдаа ажил хэргийн бүсийн 3, 4, 5 дугаар хэсэгт 711 өрхийн 2276 хүн ам,

Дунд давхрын орон сууцны бүсийн 10-14 дүгээр хэсэгт 1472 өрхийн 4710 хүн ам,

Хувийн орон сууцны бүсийн 15-18 дугаар хэсэгт 187 өрхийн 598 хүн ам тус тус суурьшина.