“Хангарьд” олон улс, хот хоорондын автобус терминал, олон улсын худалдаа логистикийн төвийн барилгын шав тавих ёслол өнөөдөр Авто худалдааны цогцолборт боллоо. Энэ үеэр мөн бүтээн байгуулалтын төслийн талбайг төвийн шугамд холбох ажлын нээлт болсон юм. Ёслолын арга хэмжээнд нийслэлийн Засаг дарга бөгөөд Улаанбаатар хотын Захирагч С.Батболд, Авто тээврийн үндэсний төвийн захирал П.Дэлгэрнаран, “Олон улсын худалдаа логистикийн төв” ХК-ийн захирал О.Мөнгөншагай болон холбогдох албаны төлөөлөл оролцов.
Энэхүү төслийн хүрээнд баригдах шинэ авто вокзал нь Улаанбаатар хотоос аймаг орон нутаг болон Улаан-Үүд, Эрээн хотын хооронд зорчих зорчигчдод олон улсын жишигт хүрсэн үйлчилгээг үзүүлэх орчин үеийн шилдэг шийдэлтэй төв байх аж. Тийз борлуулах үйлчилгээг дотоодын болон гадаадын аялагч, жуулчдад хялбар хүргэх үүднээс бүрэн автоматжсан онлайн худалдааны сүлжээг нэвтрүүлэх юм байна. Зорчигч тээврийн маршрут болон цагийн хуваарь нь ухаалаг програмаар зохицуулагдаж авто вокзал дээр түгжрэл, давхардлыг үүсгэхгүй байх нөхцлийг бүрдүүлэх гэнэ. Нийт 24 автобусны гарцтай, 4200 ам метр талбай байхаар төлөвлөжээ. Мөн тус автовокзалын дэргэд орон нутгийн зорчигч болон нийслэлийн иргэдэд зориулсан төрөл бүрийн хүнс, барааны бөөний зах байгуулахаар төлөвлөсөн байна. Бөөний худалдааны төв нь нийт 24000 ам метр талбайг хамарч 16-20 ам метр бүхий нийт 800 павильонтой байх аж. Мөн тус захтай залгаад 3000 ам метр агуулахын байр барихаар төлөвлөжээ. Барилгын ажил ирэх жилийн дөрөвдүгээр улиралд дуусч, ашиглалтад бүрэн орох юм байна.
Улаанбаатар хотыг 2020 он хүртэл хөгжүүлэх ерөнхий төлөвлөгөөг хэрэгжүүлэх, агаар, хөрсний бохирдлыг багасгах, замын хөдөлгөөний ачааллыг бууруулах зорилгоор “Авто худалдааны цогцолбор” ОНӨААТҮГ-ыг 2014 онд анх байгуулсан юм. НИТХ-ын хуралдаанаар тус цогцолборын бүтцийг өөрчилж нийслэлийн өмчит “Олон улсын худалдаа логистикийн төв” ХК болгосон. Өнөөдөр тус төв 24 га талбайд нийт 6500 авто машины зогсоол бүхий авто машин худалдан авах, борлуулахтай холбоотой бүхий л төрлийн үйлчилгээ буюу тээврийн хэрэгслийн бүртгэл, шилжилт хөдөлгөөн, дугаар олголт, татвар, даатгал, банк нотариатын үйлчилгээг нэг дор төвлөрүүлэн ажиллаж байна.
“Эм Би Би Си”, “Магма Од” ХХК-ийн түншлэл нийслэлийн өмчит “Олон улсын худалдаа логистипийн төв” ХК-ийн шинэ бүтээн байгуулалтын хүрээнд хийгдэх цахилгаан, дулаан, цэвэр, бохир усны төвлөрсөн шугамд холбох барилгын ажлыг гүйцэтгэхээр шалгарч өнөөдөр ажлын талбайгаа хүлээж авлаа. Нийт 130 га талбайд энэхүү ажлыг хийж гүйцэтгэх юм байна.
Нийслэлийн Засаг дарга бөгөөд Улаанбаатар хотын Захирагч С.Батболд “Улаанбаатар хотын төвлөрлийг сааруулах үүднээс үе үеийн хотын дарга нар тодорхой ажлуудыг санаачлан зохион байгуулж ирсэн. Үүний нэг нь хотын шинэ суурьшлын бүсүүд рүү захуудыг нүүлгэх ажил юм. 2014 онд нийслэлийн төсвөөс 20 гаруй тэрбум төгрөг гаргаж энэ цогцолборыг байгуулсан. 2016 онд энэ цогцолборын үйл ажиллагаа зогсонги болсон байсан. Нийслэлээс мэргэжлийн байгууллагуудтай хамтран ил задгай авто машины худалдааг хотоос нүүлгэсэн. Үүний үр дүнд цогцолборын үйл ажиллагаа сэргэж өнөөдрийн байдлаар 2300 орчим машин худалдаалагдахаар байршсан байна.
Авто худалдааны цогцолборын бүтцийг өөрчилж, хувьцаат компани болгосноор гадна, дотны хөрөнгө оруулалтыг татах томоохон боломж бүрдэж байгаа. Энд зөвхөн авто худалдааны үйлчилгээ биш олон улсын логистикийн төв, зорчигч тээврийн төв, худалдааны төв болгох зорилт дэвшүүлэн ажиллаж байна. Дэд бүтэц шийдэгдсэнээр энд төвлөрөл, суурьшил бий болох боломжтой” хэмээв.
“Аливаа бүтээн байгуулалтыг явуулахад нэн тэргүүнд шийдэх асуудал байсан инженерийн шугам сүлжээг холбох дэд бүтцийн ажлыг богино хугацаанд шийдвэрлэж өгсөн хотын холбогдох албаныханд талархал илэрхийлэе. Нийтдээ 6.1 км урттай Баянголын амнаас орж ирэх төвийн шугамтай холбох эхний ээлжийн 6.3 тэрбум өртөг бүхий ажлыг гүйцэтгэснээр бүтээн байгуулалтаа цааш үргэлжлүүлэх нөхцөл боломж бүрдэх юм. Энэхүү бүтээн байгуулалтыг бүрэн хэрэгжүүлснээрээ үр өгөөж нь 2022 он гэхэд 20 мянган ажлыг байр шинээр бий болно, мөн улсад 20 тэрбум төгрөгийн татварыг төвлөрүүлэх, УБ хотод агаар хөрсний бохирдлыг бууруулах, төвлөрлийг сааруулах, замын хөдөлгөөний ачааллыг бууруулах зэрэг эерэг өөрчлөлтийг улс оронд маань авчрах маш чухал төсөл юм.
Бид дараагийн шатны бүтээн байгуулалтаа төмөр замын давуу талаа ашиглан нэг бүс нэг зам санаачлагатай уялдуулсан үндэсний хэмжээний логистикийн төв болно гэсэн зорилготойгоор “Олон улсын тээвэр логистик төв” ХК болон шинэчлэгдсэн юм. Эхний ажил болох зорчигч тээврийн автобус терминалын барьж байгуулах ажлын шавыг өнөөдөр тавьж байна. Хөгжлийн уян хатан загвар дээр суурилж, зах зээлийг хөгжүүлэн тэлж, эерэг имидж бүрдүүлсэн үндэсний тээвэр логистикийн шинэчлэлийн суурь болно” хэмээн Олон улсын худалдаа логистикийн төв ХХК-ийн гүйцэтгэх захирал О.Мөнгөншагай ярилаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.